नेट युझर्ससाठी ही बातमी खूप महत्वाची आहे. तुम्ही मनोरंजनासाठी युट्यूबचा वापर करतात का? त्यावर येणारी जाहिरात तुम्ही स्कीप करतात का? हो, मग तुम्हाला गुगल मोठा धक्का देण्याच्या तयारीत आहे. जाहिरातींशिवाय YouTube वर व्हिडिओ पाहणे अधिक महाग होणार आहे. गुगल आपल्या लाखो यूट्यूब युझर्सला नवीन वर्षात प्लॅन दरवाढीचा धक्का देण्याच्या तयारीत आहे.

रिपोर्टनुसार, गुगल जानेवारीपासून यूट्यूब प्रीमियम सब्सक्रिप्शन प्लॅन महाग करणार आहे. कंपनीने अलीकडेच जागतिक स्तरावर YouTube चे सबस्क्रिप्शन प्लॅन वाढवले ​​होते. YouTube ची नवीन प्रीमियम सब्सक्रिप्शन प्लॅन 13 जानेवारी 2025 पासून वाढतील. त्यामुळे युझर्स 12 जानेवारीपर्यंत जुन्या दराने सबस्क्रिप्शन प्लॅन खरेदी करू शकतात.

The Vergeच्या रिपोर्टनुसार, पुढील वर्षी 13 जानेवारी 2025 पासून YouTube Premium सबस्क्रिप्शन प्लॅन महाग होतील. कंपनी प्लॅनसाठी पूर्वीपेक्षा 10 डॉलर जास्त आकारणार आहे. रिपोर्टनुसार, सध्या YouTube Premium ची मूळ प्लॅनची किंमत $72.99 आहे. प्लॅन दर सुधारित केल्यानंतर युझर्सला $82.99 खर्च करावे लागतील.

भारतातही किंमत वाढेल का?

सध्या भारतात YouTube Premium च्या किमतीत कोणतीही वाढ जाहीर करण्यात आलेली नाहीये. कंपनीने काही महिन्यांपूर्वीच भारतात YouTube Premium प्लॅनची किंमत वाढवली होती. पण जागतिक बाजारपेठेत जेव्हा-जेव्हा YouTube प्रीमियम प्लॅनचे दर वाढवले ​​गेले आहेत, तेव्हा त्याचा परिणाम भारतातही दिसून आलाय.

कंपनीचे म्हणणे आहे की, प्लॅटफॉर्मची सेवा सुधारण्यासाठी, प्लॅनचे दर वाढवले ​​जातील जेणेकरून युझर्सला चांगली गुणवत्ता मिळू शकेल. 13 जानेवारीपासून नवीन दर लागू झाल्यानंतर युझर्सला पहिल्या बिल सायकलमध्ये अधिक खर्च करावा लागेल. तर कंपनी आता प्रमोशनल आणि ट्रायल ऑफर बंद करणार नसून त्या पूर्वीप्रमाणेच सुरू राहतील.

भारतात YouTube प्रीमियम प्लॅनसाठी, वैयक्तिक युझर्सला दरमहा 149 रुपये खर्च करावे लागतील. त्याचबरोबर विद्यार्थ्यांना दरमहा 89 रुपये खर्च करावे लागतात. फॅमिली प्लॅनसाठी भारतात प्रति महिना 299 रुपयांचे शुल्क आकारले जाते. प्रीपेड मासिक योजनेसाठी, युझर्सला दरमहा 159 रुपये खर्च करावे लागतील. या तिमाही प्लॅनसाठी 459 रुपये आणि वार्षिक योजनेसाठी 1,490 रुपये खर्च येत असतो.