गेल्या काही दिवसांपासून सोने आणि चांदीच्या दरात मोठी घसरण पाहायला मिळत आहे. सलग झालेल्या दरवाढीनंतर गुंतवणूकदारांकडून नफा वसुली करण्यात आली असून, जागतिक बाजारातील बदललेल्या परिस्थितीचाही परिणाम मौल्यवान धातूंच्या दरावर दिसून आला आहे. मात्र, बाजारातील या घसरणीनंतर भविष्यातील दरांबाबतचे चित्र अद्याप पूर्णपणे स्पष्ट झालेले नाही.

दरम्यान आगामी सणासुदीचा आणि लग्नसराईचे वातावरण सुरू होत असल्याने देशात मागणीत वाढ होण्याची शक्यता आहे. त्यामुळे सोन्या चांदीच्या दरांना पुन्हा आधार मिळू शकतो. असा अंदाज बाजारातील तज्ञांकडून व्यक्त करण्यात आला आहे. काही तज्ञांनी आगामी काही महिन्यांत सोन्या चांदीच्या दरात मोठी वाढ होण्याची शक्यता आहे. केडिया अ‍ॅडव्हायजरीचे संचालक अजय केडिया यांच्या मते सप्टेंबरच्या अखेरीस 10 ग्रॅम सोन्याचा भाव 1.60 लाख रुपयांपर्यंत पोहोचू शकतो. तर वर्षअखेरीस सोन्याचा दर 1.80 लाख रुपयांच्या पातळीवर जाऊ शकतो. चांदीच्या दराबाबतही त्यांनी मोठी वाढ होणार असल्याचे सांगितले. चांदीचा भाव हा 3 लाख रुपयांपर्यंत पोहोचण्याचा अंदाज आहे.

सध्या सोने-चांदीचे दर का घसरत आहेत?

सोने आणि चांदीच्या दरातील अलीकडील घसरण ही बाजारातील सामान्य असल्याचे बोलले जात आहे. सलग झालेल्या दरवाढीनंतर काही गुंतवणूकदारांनी नफा वसूल करण्यास सुरुवात केली. त्यामुळे मौल्यवान धातूंच्या किमतीवर परिणाम निर्माण झाला आहे. तसेच आंतरराष्ट्रीय बाजारातील घडामोडींचाही भारतातील सोने-चांदीच्या दरांवर थेट परिणाम होत असतो.