केंद्रीय सरकारी कर्मचारी आणि पेन्शनधारकांसाठी महागाई भत्त्याबाबत (DA Hike 2026) महत्त्वाची अपडेट समोर आली आहे. जुलै २०२६ पासून लागू होणाऱ्या महागाई भत्ता वाढीची कर्मचारी आणि पेन्शनधारक वाट पाहत आहेत. आता २१ ऑक्टोबर रोजी होणाऱ्या केंद्रीय मंत्रिमंडळाच्या बैठकीकडे सर्वांचं लक्ष लागलं आहे. या बैठकीत सरकार महागाई भत्ता वाढीबद्दल निर्णय घेणार का, याबाबत चर्चा सुरू आहे. पण, यासंदर्भात सरकारकडून अद्याप अधिकृत घोषणा करण्यात आलेली नाही.

महागाई भत्ता ६० टक्क्यांवरून ६३ टक्के होणार?

सध्या केंद्रीय कर्मचाऱ्यांना बेसिक सॅलरीच्या ६० टक्के दराने महागाई भत्ता मिळत असल्याचं दिलेल्या वृत्तात नमूद करण्यात आलं आहे. जुलै २०२६ च्या सुधारित दरात ३ टक्क्यांची वाढ झाल्यावर DA टक्क्यांपर्यंत पोहोचू शकतो. पण ही फक्त संभाव्य वाढ असून अंतिम निर्णय सरकारच्या अधिकृत घोषणेनंतरच स्पष्ट होईल.

१४ ऑक्टोबर रोजी झालेल्या मंत्रिमंडळाच्या बैठकीमध्ये DA वाढीची घोषणा होईल, अशी अपेक्षा होती. पण त्या बैठकीत याबाबत निर्णय जाहीर झाला नाही. त्यामुळे आता २१ ऑक्टोबरच्या बैठकीकडे कर्मचारी संघटना आणि पेन्शनधारकांचे लक्ष आहे.

पगारात किती वाढ होऊ शकते?

समजा, एखाद्या कर्मचाऱ्याची बेसिक सॅलरी ३०,००० रुपये आहे. सध्याच्या ६० टक्के DA नुसार त्याला दरमहा १८००० रुपये महागाई भत्ता मिळतो. DA ६३ टक्के झाल्यावर ही रक्कम १८,९०० रुपये होईल. म्हणजेच दरमहा ९०० रुपये आणि वर्षाला १०,८०० रुपयांची वाढ होऊ शकते. महागाई भत्त्यात साधारणपणे वर्षातून दोनदा, जानेवारी आणि जुलैमध्ये सुधारणा केली जाते. यासाठी औद्योगिक कामगारांचा ग्राहक किंमत निर्देशांक (AICPI-IW) आणि त्याच्या आधारे मोजली जाणारी महागाई विचारात घेतली जाते.

पेन्शनधारकांनाही मिळणार लाभ?

DA वाढीसोबत केंद्र सरकारच्या पेन्शनधारकांच्या महागाई राहत (DR) दरातही वाढ होण्याची शक्यता असते. मात्र, वाढीचा दर, अंमलबजावणीची तारीख आणि थकबाकी याबद्दल अधिकृत घोषणा होणं गरजेचं आहे.