सरकारी कर्मचारी आठव्या वेतन आयोगाची गेल्या अनेक महिन्यांपासून वाट पाहत आहेत. आठव्या वेतन आयोगासाठी शिफारसी तयार करण्यासाठी समिती स्थापन केली आहे. या शिफारसींना मंजुरी दिल्यानंतर कर्मचाऱ्यांच्या पगारात प्रत्यक्ष वाढ होणार आहे. यासाठी आता बैठका घेण्यास सुरुवात झाली आहे.

केंद्र सरकारी कर्मचारी आणि निवृत्तीवेनधारक संघटनाचे नेतृत्व करणाऱ्या राष्ट्रीय परिषदेची मसुदा समिती १३ एप्रिल २०२६ रोजी बैठक घेणार आहे. य बैठकीत आठव्या वेतन आयोगाच्या शिफारसींवर चर्चा होण्याची शक्यता आहे. केंद्र सरकारी कर्मचारी या बैठकीची वाट पाहत आहे. यामध्ये पगारवाढीबाबत महत्त्वाची चर्चा होण्याची शक्यता आहे.

मसुदा समितीच्या सदस्यांची पुढची बैठक १३ एप्रिल २०२६ रोजी होणार आहे. याआधी ही बैठक १२ मार्च २०२६ रोजी झाली होती. यामध्ये आठव्या वेतन आयोगाच्या मसुदा समितीचे सर्व सदस्य, कर्मचारी आणि निवृत्तीवेतनधारकाच्या संघटना चर्चा करतील. १२ मार्च रोजी झालेल्या बैठकीच्याच पुढची ही बैठक असणार आहे. यामध्ये एनसी जेसीएमच्या मसुदा समितीचे सदस्य कर्मचारी आणि निवृत्तीवेतनधारकासाठी पेन्शन, भत्ते आणि नोकरीच्या अटींसंदर्भात चर्चा करत आहेत.

१३ एप्रिलला होणाऱ्या बैठकीत रेल्वे, संरक्षण कर्मचारी प्रतिनिधींचाही समावेश आहे. या बैठकीत प्रस्ताव मांडण्यात येणार आहे. अंतिम निवेदन झाल्यावर ते आठव्या वेतन आयोगाकडे सादर केले जातील. यामध्ये विविध विभागनिहाय मुद्द्यांचा समावेश असेल.

याआधीही आठव्या वेतन आयोगाबाबत महत्त्वाची चर्चा झाली आहे. सरकारी कर्मचाऱ्यांना त्यांच्या सूचना सादर करण्यास सांगितल्या होत्या. त्यासाठी ३१ मार्चपर्यंत मुदत होती. यापूर्वी एनसी जेसीएमने आठव्या वेतन आयोगाच्या अध्यक्षा रंजना प्रकाश देसाई यांना पत्र लिहून प्रश्नावलीच्या स्वरुपात नऊ बदल करण्याची विनंती केली होती.