गेल्या महिनाभरातील नाट्यमय राजकीय घडामोडीनंतर राज्यात सत्तेवर आलेल्या शिवसेना, राष्ट्रवादी काँग्रेस व काँग्रेसच्या महाविकास आघाडी सरकारने शनिवारी विश्वासदर्शक ठराव बहुमताने जिंकला. मुख्यमंत्री उद्धव ठाकरे यांच्या सरकारला १६९ आमदारांचे समर्थन असल्याचेही याद्वारे स्पष्ट झाले.

गेल्या महिनाभरातील नाट्यमय राजकीय घडामोडीनंतर राज्यात सत्तेवर आलेल्या शिवसेना, राष्ट्रवादी काँग्रेस व काँग्रेसच्या महाविकास आघाडी सरकारने शनिवारी विश्वासदर्शक ठराव बहुमताने जिंकला. मुख्यमंत्री उद्धव ठाकरे यांच्या सरकारला १६९ आमदारांचे समर्थन असल्याचेही याद्वारे स्पष्ट झाले. ठरावाप्रसंगी एमआयएमचे दोन तसेच मनसे व माकपच्या प्रत्येकी एका आमदाराने तटस्थ भूमिका घेतली. तर भाजपने सभागृहातून सभात्याग केल्याने विश्वासदर्शक ठराव प्रस्तावाच्या विरोधात शून्य मते पडली.

मुख्यमंत्रिपदाची शपथ घेतलेल्या उद्धव ठाकरे यांच्या सरकारने राज्यपालांच्या सूचनेनुसार विधानसभेत बहुमत सिद्ध करण्यासाठी दोन दिवसांचे विशेष अधिवेशन बोलावले होते. त्यानुसार शनिवारी सभागृहाचे काम सुरू होताच हंगामी अध्यक्ष म्हणून राष्ट्रवादी काँग्रेसचे दिलीप वळसे पाटील यांच्या नावाची घोषणा झाली. कामकाज सुरू होताच विधिमंडळाचे भाजप गटनेते देवेंद्र फडणवीस यांनी हरकतीचा मुद्दा मांडत मुख्यमंत्री तसेच इतर मंत्र्यांचा शपथविधी, हंगामी अध्यक्ष बदलणे हे नियमबाह्य असल्याचा आक्षेप नोंदवला. तो अध्यक्षांनी फेटाळून लावल्यानंतर आधी आवाजी मतदान घेऊन नंतर शिरगणतीद्वारेही मतदान झाले. सरकारच्या बाजूने बहुमत असल्याची जाणीव असल्याने भाजप तसेच भाजप समर्थक अपक्ष सदस्यांनी मतदान सुरू होताच सभात्याग केला. त्यानंतर सरकारच्या बाजूने असलेल्या सदस्यांची गणती करण्यात आली. यावेळी विश्वास ठरावाच्या बाजूने १६९ मते तर, विरोधकांनी सभात्याग केला असल्याने साहजिकच विरोधात शून्य मते पडली.

'केवळ छत्रपतींचे नाव घेऊन शपथ घेतली, तर यांना एवढ्या इंगळ्या का डसल्या? छत्रपतींचे नाव घेणे गुन्हा असेल तर मी तो एकदा नाही, दहादा नाही, प्रत्येक जन्मात करीन,' असे मुख्यमंत्री उद्धव ठाकरे यांनी निक्षून सांगितले.

विश्वासदर्शक ठराव मोठ्या संख्याबळाने मंजूर झाल्याने आज, रविवारी होणाऱ्या विधानसभा अध्यक्षपदाच्या निवडणुकीतील चुरस संपली आहे. सत्तारूढ महाविकास आघाडीकडून अध्यक्षपदासाठी नाना पटोले तर, भाजपकडून किसन कथोरे यांनी उमेदवारी अर्ज दाखल केले आहेत.

मंत्रिपदासाठी इच्छुक राष्ट्रवादी काँग्रेसमधील आमदारांची संख्या वाढल्यानेच राज्य मंत्रिमंडळ विस्तार नागपूर अधिवेशनानंतर होईल, असे बोलले जात आहे. मात्र, तो अधिवेशनापूर्वीच होईल, असे राष्ट्रवादी, काँग्रेस आणि शिवसेनेतील ज्येष्ठ नेते खासगीत सांगत आहेत.

Web Title:   uddhav thackeray led government proved its majority in a floor test in maharashtra assembly