पुणे: सहायक प्रादेशिक परिवहन अधिकारी दत्तात्रय सांगोलकर यांनी डेक्कन पोलिस ठाण्यात फिर्याद दिली असून, त्यानुसार जंगली महाराज रस्त्यावरील संगमेश्वर पीयूसी सेंटर चालकावर गुन्हा दाखल करण्यात आला आहे. एखाद्या विशिष्ट वाहनाचे 'पीयूसी' प्रमाणपत्र घेण्यासाठी ते वाहन पीयूसी केंद्रावर घेऊन जाणे, त्या ठिकाणी गॅस अॅनालायझर मशिनद्वारे वाहनाची तपासणी करणे अपेक्षित असते. केंद्रीय रस्ते वाहतूक व महामार्ग मंत्री नितीन गडकरी यांच्या एका गाडीचे बनावट 'पीयूसी' (वाहन प्रदूषण चाचणी प्रमाणपत्र) दिल्याचा प्रकार उघडकीस आला आहे. पुण्यातील दोन पीयूसी केंद्रांनी आणि नागपूर, चंद्रपूर येथील केंद्रावर ही बनावट पीयूसी काढण्यात आली होती. या प्रकरणी पुण्यातील संबंधित पीयूसी केंद्र चालकावर गुन्हा दाखल करण्यात आला आहे. 

वाहनाची तपासणी न करता 'पीयूसी' दिल्याचा प्रकार शहरात यापूर्वी अनेकदा उघडकीस आला आहे. माध्यमांनीदेखील यावर अनेकदा प्रकाशझोत टाकला होता. मात्र, यापूर्वी बनावट पीयूसी प्रकरणी गुन्हा दाखल करण्यात आला नाही किंवा संबंधितांची मान्यता रद्द करण्यात आल्याचे आढळून येत नाही. या केवळ केंद्रीय मंत्री नितीन गडकरी यांची गाडीबाबत हा प्रकार घडल्याने गुन्हा दाखल करण्यापर्यंतची कारवाई केली का, असा प्रश्न उपस्थित केला जात आहे.

जंगली महाराज रस्त्यावर साई सर्व्हिस येथील पेट्रोल पंपाजवळ संगमेश्वर पीयूसी सेंटरमध्ये एका अनोळखी वाहनचालकाने 'एमएच-४९, एई-२७००' हा वाहन नोंदणी क्रमांक सांगून 'पीयूसी' प्रमाणपत्र घेतले. त्यापैकी एक प्रमाणपत्र १४ सप्टेंबर ते १३ मार्च २०२० आणि दुसरे प्रमाणपत्र १३ मार्च २०२० ते १२ सप्टेंबर २०२० या कालावधीचे आहेत. हा प्रकार उघडकीस आल्यानंतर आरटीओच्या अधिकाऱ्यांनी तातडीने कार्यवाही करून संबंधित पीयूसी चालकाची मान्यता रद्द केली. त्यानंतर कायदेशीर कारवाईसाठी तक्रारही दाखल केली आहे, अशी माहिती आरटीओ अधिकाऱ्यांनी दिली. डेक्कन पोलिस पुढील तपास करीत आहेत.

Web Title case filed against puc centre in pune for fake car tag owned by nitin gadkari