संजय राठोड
यवतमाळ : शेतात लागवड केलेल्या पिकांच्या वाढीसाठी शेतकरी खत देत आहे. मात्र शेतकऱ्यांना बनावट खत देत वासवणूक केल्याचा प्रकार समोर आला आहे. यवतमाळ जिल्ह्यातील आर्णी व नेरमध्ये समोर आले असून कृषी विभागाच्यावतीने कारवाई करण्यात आली आहे. या कारवाईत दोन विक्रेत्यांसह कंपनीच्या प्रतिनिधींवर गुन्हा दाखल करण्यात आला आहे. 

खरीप हांगाच्या (Kharip Hangam) पार्श्वभूमीवर बियाणे व खतांचा साठा केला जात असतो. पीक लागवड केल्यानंतर शेतकरी खतांची खरेदी करत असतो. परंतु या खत विक्रीत आर्णी व नेर येथील कृषी केंद्रातून माती मिश्रित खते विक्री केली जात असल्याची माहिती गुणवत्ता नियंत्रण पथकाला मिळाली होती. या माहितीच्या आधारे दोन्ही ठिकाणी छापा टाकून कारवाई करण्यात आली. याठिकाणी पथकाने खताची तपासणी केली असता यात माती मिश्रित खात आढळून आले. यामुळे सदर पथकाने दोन्ही दुकानावर कारवाई केली. 

दुकानांना सील लावत केला गुन्हा दाखल 

यवतमाळच्या (Yavatmal) नेर आणि आर्णी येथे विभागीय गुणवत्ता नियंत्रण पथकाने कारवाई करून दुकानाला सील ठोकले. तसेच बनावट खते विक्री करून शेतकऱ्यांची फसवणूक केल्याप्रकरणी दोन स्थानिक व्यावसायिक आणि खत उत्पादक कंपनीच्या प्रतिनिधीवर गुन्हे दाखल करण्यात आले आहेत.