Unseasonal Rain In Beed :

बीड जिल्ह्यात सलग दुसऱ्या दिवशी अवकाळी पावसाने धुमाकूळ घातला आहे. बीडच्या वडवणी, धारूर, गेवराई यासह जिल्ह्यातील काही भागांमध्ये अवकाळी पावसासह जोरदार गारांचा वर्षाव आजही (शुक्रवार) झाला. यामुळे शेतकऱ्यांच्या फळबागांसह पिकांचं अतोनात नुकसान झाले आहे. (Maharashtra News)

आज वडवणी तालुक्यातील कवडगाव, मोरेवाडी, देवडी, पिंपरखेड, साळींबा या गावात गारपीट झाली. यामुळे शेतातील आंब्याच्या बागांसह कलिंगड, बाजरी, कांदा यासह अन्य पिकांचे अतोनात नुकसान झाले आहे. दरम्यान प्रशासनाने तात्काळ पंचनामे करून सरकारने नुकसान भरपाई द्यावी अशी मागणी नुकसानग्रस्त शेतकऱ्यांमधून हाेऊ लागली आहे. या गारपिटीचा फटका पोल्ट्री फार्म व्यवसाय करणाऱ्या तरुण शेतकऱ्याला देखील बसला आहे.

वडवणी तालुक्यातील गणेश आंधळे या तरुण शेतकऱ्याने उदारनिर्वाहाचे साधन म्हणून पोल्ट्री फार्म सुरू केला होता. गारपिटीमुळे आणि अवकाळी पावसाने जवळपास दीडशे ते 200 कोंबड्या मरण पावल्या. यामुळे गणेश आंधळे यांचे मोठं नुकसान झालं आहे. त्यामुळे पालकमंत्री यांनी तात्काळ पंचनाम्याचे आदेश देऊन नुकसान भरपाई द्यावी अशी मागणी आंधळे यांनी साम टीव्हीशी बाेलताना केली.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

Edited By : Siddharth Latkar