अजय सोनवणे 

मनमाड (नाशिक) : सोयाबीनच्या दरात मागील काही दिवसात घसरण झाल्याचे पाहण्यास मिळत आहे. दरम्यान केंद्र सरकारच्या आधारभूत किंमत खरेदी योजनेअंतर्गत नाशिकच्या लासलगाव येथे एनसीसीएफ या संस्थेअंतर्गत लासलगाव विभाग सहकारी खरेदी विक्री संघामार्फत सोयाबीन खरेदी केंद्राचे शुभारंभ करण्यात आला आहे. यामुळे शेतकरी सोयाबीन विक्रीसाठी आणू लागला आहे. 

खरीप हंगामात लागवड केलेला बहुतांश सोयाबीनची काढणी पूर्ण झाली आहे. यामुळे शेतकरी हा सोयाबीन विक्रीसाठी मार्केटमध्ये आणत आहे. दरम्यान सुरवातीला चांगला भाव मिळाल्यानंतर दारात काहीशी (Soyabean Price) घसरण झाली आहे. तर काही ठिकाणी हमीभावापेक्षा कमी दराने खरेदी केली जात असल्याने शेतकरी सोयाबीन घरात भरून ठेवत आहे. मात्र काही शेतकरी (Farmer) अडचणीमुळे मिळेल त्या भावात विक्री करत आहेत. 

लासलगाव येथे सोयाबीन खरेदीला सुरुवात करण्यात आली असून ४ हजार ८९२ रुपये प्रतिक्विंटल या प्रमाणे सोयाबीन खरेदी करण्यात येणार आहे. यामुळे शेतकरी येथे सोयाबीन विक्रीसाठी आणू लागला आहे. सरकारच्या आधारभूत किंमत खरेदी योजनेअंतर्गत एनसीसीएफ या संस्थेअंतर्गत हि खरेदी केली जात आहे. 

शेतकऱ्यांना नोंदणी आवश्यक 

शेतकऱ्याने अगोदर सोयाबीन नोंदणी करावी. तसेच प्रतवारी करून १२ आद्रतेच्याखाली सोयाबीन आणावी. प्रति शेतकरी एक हेक्‍टर क्षेत्र असलेल्या शेतकऱ्याची साडेतेरा क्विंटलपर्यंत सोयाबीन खरेदी करण्यात येणार आहे. यामुळे शेतकरी देखील सोयाबीन विक्रीसाठी नोंदणी करत आहेत.