नंदुरबार : मंदाणे शिवारात गुरुवारी सकाळी ११ वाजेच्या सुमारास १५ एकर क्षेत्रात लागवड केलेल्या उसाच्या शेताला आग लागली आहे. या आगीत सुमारे ८ लाखांचे नुकसान झाले आहे. सायंकाळी उशिरापर्यंत शहादा, पानसेमल या ठिकाणी अग्निशमन दल आणि ग्रामस्थांच्या मदतीने आग विझविण्यात यश आले आहे. मात्र, वारा जोराचा असल्याने आगीत संपूर्ण ऊस जळून खाक झाला आहे. शुक्रवारी सकाळी या उसाचा पंचनामा करण्यात आला आहे.

हे देखील पहा-

वडगाव रस्त्यालगत सर्व्हे क्रमांक ४२ मध्ये गुलाबराव मोरे आणि शहादा बाजार समितीचे संचालक किशोर मोरे यांनी १५ एकर क्षेत्रात उसाची लागवड केली होती. काही दिवसांनी ऊसतोडणीचे नियोजन करण्यात आले असताना, गुरुवारी सकाळी ११ वाजेच्या सुमारास उसाच्या शेताला आग लागल्याचे वृत्त गावात येऊन धडकले होते. ग्रामस्थांनी घटनास्थळी धाव घेतली. मिळेल त्या साधनाने आग विझविण्याकरिता मदत करण्यात येत होती.

शेतमालक देखील घटनास्थळी पोहचले होते. जोरात वारा वाहत असल्याने आगीने रौद्ररूप धारण केले होते. पानसेमल आणि शहादा येथील पालिकेच्या अग्निशमन दलाला पाचारण करण्यात आले होते. उसाला नुकतेच पाणी सोडले होते. त्यामुळे बंब शेतात नेण्यासाठी खूपच कसरत करावी लागली होती. सायंकाळी उशिरापर्यंत आग विझविण्यात यश आले.

तोपर्यंत मोठ्या प्रमाणात ऊस आगीच्या भक्ष्यस्थानी पडला होता. मंडलाधिकारी सुनील खैरनार आणि तलाठी एच. पी. धनगर यांनी घटनास्थळी भेट देऊन पाहणी करण्यात आली आहे. नुकसानीचा पंचनामा करून, तहसील कार्यालयात अहवाल सादर केला आहे. दरम्यान, आगीचे कारण अद्याप समजू शकले नाही.

Edited By- Digambar Jadhav