बालाजी सुरवसे 

धाराशिव : शेतकऱ्यांना सरसकट कर्जमाफी द्यावी, दुधाला दर वाढवून द्यावा; यासह शेतकऱ्यांच्या विविध मागण्यांसाठी धाराशिवमध्ये  राष्ट्रवादी शरद पवार गट आक्रमक झाला. या मागण्या घेऊन जिल्हाधिकारी कार्यालयासमोर घंटानाद आंदोलन करत सरकारच्या विरोधात जोरदार घोषणाबाजी करण्यात आली. 

शेतकऱ्यांना (Farmer) पीक कर्जाची समस्या येत आहे. चांगले उत्पन्न मिळत नसल्यामुळे कर्जफेड करणे शेतकऱ्यांना शक्य नाही. यामुळे शेतकऱ्यांना सरसकट कर्जमाफी देण्यात यावी या प्रमुख मागणीसाठी आंदोलन छेडण्यात आले. तसेच गाईच्या दुधाला ४० रुपये प्रतिलिटर तर म्हशीच्या दुधाला ७० रुपये प्रतिलिटर भाव द्यावा. जाहीर केलेले दुधाचे ५ रुपये अनुदान फेब्रुवारीपासुन लागु करावे, शेतकऱ्यांना पिककर्ज (Crop Loan) वाटप न करणाऱ्या बँकांवर फौजदारी गुन्हे दाखल करावे, कारखान्याकडील ऊसाचे थकीत बिल शेतकऱ्यांना तातडीने द्यावे; यासह शेतीवरील संपुर्ण कर्जमाफी करावी या मागणीसाठी हे आंदोलन करण्यात आले.

विमा कार्यालय फोडण्याचा इशारा 

आंदोलनाच्या (Dharashiv News) पाश्र्वभूमीवर जिल्हाधिकारी कार्यालयाचे मुख्य गेट बंद करण्यात आले होते. दरम्यान शासनाने या मागण्या तातडीने मान्य न केल्यास व शेतकऱ्यांना येत्या पंधरा दिवसात विमा न दिल्यास मुंबईतील विमा कंपनीचे कार्यालय फोडु; असा इशारा यावेळी राष्ट्रवादीचे नेते दुधगावकर यांनी दिला.