Video : '...तर दुसऱ्याच दिवशी सरकार कोसळणार'; राष्ट्रवादी काँग्रेसच्या जेष्ठ नेत्याचं मोठं भाकीत

Eknath Khadse News : शिंदे गटाच्या बंडखोरीमुळे राज्यातील राजकारण बदललं आहे. शिंदे गटाने भाजपसोबत युती केल्यानंतर राज्यात एकनाथ शिंदे (Eknath Shinde) मुख्यमंत्रिपदी विराजमान झाले आहेत. मात्र,विरोधकांकडून शिंदे सरकार कोसळेल असा दावा करत आहेत. त्यानंतर आता राष्ट्रवादी काँग्रेसचे जेष्ठ नेते आमदार एकनाथ खडसे (Eknath Khadse) यांनी देखील शिंदे सरकार कोसळेल असा दावा केला आहे. आता शिंदे सरकारचा मंत्रिमंडळ विस्तार झाल्यास दुसऱ्या दिवशी कोसळेल असा दावा केला आहे. ते एका कार्यक्रमात बोलत होते.

एकनाथ खडसे म्हणाले, 'बंडखोर आमदार अस्वस्थ झालेले आहेत. त्यांना मंत्रिपद मिळणार नाही असं त्यांना वाटतंय. त्यांना लवकर मंत्रिमंडळाचा विस्तार होणार नाही असंही वाटतंय. जेव्हा शिंदे सरकार कोसळण्याची स्थिती येईल, त्याच्या महिनाभर आधी मंत्रिमंडळाचा विस्तार होईल, असे भाकीत राष्ट्रवादीचे जेष्ठ नेते एकनाथ खडसे यांनी केलं आहे. आता मंत्रिमंडळाचा विस्तार केला तर दुसऱ्या दिवशीच सरकार कोसळेल, असाही दावा खडसे यांनी केला आहे.

दरम्यान, खडसे यांनी मंत्री गुलाबराव पाटील यांच्यावरही टीका केली. 'गद्दारी माझ्या रक्तात नाही, असं केलं तर दोन बापाचा होईल, असं गुलाबराव पाटील सांगायचे. मग आता त्यांनी काय केलं?'असा खोचक सवाल करत खडसे यांनी करत गुलाबराव पाटील यांच्यावर निशाणा साधला आहे. गद्दारी करून हे लोक सत्तेवर आले आहेत. आता हेच लोक उद्धव ठाकरेंना अक्कल शिकवत असल्याची टीका खडसे यांनी शिंदे गटावर केली.