संजय गडदे, साम टीव्ही, प्रतिनिधी

महिलांवरील अत्याचाराच्या घटनात दिवसेंदिवस वाढ होत आहे. रात्रीचे महिलांसाठी घराबाहेर पडणे सुरक्षित नाही, मात्र आता दिवसा देखील घराबाहेर पडणे अवघड झाले आहे. यातच आता एक संतापजनक प्रकार समोर आला आहे.

मुंबईच्या जुहू परिसरात भर रस्त्यात एका तरुणाने महिलेला आवाज देऊन महिलेसमोर त्याने पॅन्ट काढून गैरवर्तन केल्याचा प्रकार घडला आहे. या घटनेचा व्हिडिओही समोर आला आहे. जो सोशल मीडियावर व्हायरल होत आहे. हा सगळा प्रकार जुहू येथील जानकी कुटीर परिसरात आज सकाळी 8: 55 वाजता घडला. संबंधित महिलेनेच हा व्हिडिओ एक्सवर शेअर केला आहे.

महिलेने तरुणाचा चेहरा मोबाईल कॅमेऱ्यात कैद करण्याचा प्रयत्न केला, मात्र त्या ठिकाणावरून तरुणाने पळ काढल्याचं या व्हिडिओमध्ये दिसून येत आहे. या घटनेनंतर महिलेने निर्भया पथकाला संपर्क साधण्याचा प्रयत्न केला, मात्र निर्भया पथकाकडून प्रतिसाद मिळाला नसल्याचे या महिलेने म्हटले आहे.

यानंतर महिलेने आपली तक्रार एक्स या सोशल माध्यमातून मुंबई पोलिसांकडे केली आहे. शिवाय पोलिसांनी या ठिकाणी अधिक सुरक्षा वाढवावी ,अशी विनंती देखील केली आहे.

महिलेने सोशल मीडियावर व्हिडिओ पोस्ट करत मुंबई पोलिसांना टॅग केला. त्यानंतर आता मुंबई पोलिसांनीही याची दखल घेतली आहे. पोलिसांनी याप्रकरणी महिलेला अधिक माहिती देण्याची विनंती केली आहे. आता याप्रकरणी पुढे काय कारवाई होते, हे पाहणं महत्त्वाचं ठरणार आहे.