हिमाचल प्रदेशातील अनेक जिल्ह्यांमध्ये मुसळधार पावसामुळे नद्या दुथडी भरून वाहत आहेत. धो धो पडणाऱ्या पावसामुळे दरडी कोसळण्याच्या घटनाही दररोज समोर येत आहेत. अशीच एक घटना कांगडा येथील जम्मू रेल्वे मार्गावर घडली आहे. हजारो प्रवाशांनी भरलेली ट्रेन पुलावरून जात असताना रेल्वे पुलाच्या पायाचा मोठा भाग पाण्यात वाहून गेला असल्याची घटना घडली आहे. अपघातानंतर रेल्वेच्या दुरुस्तीचे काम जलद गतीने करण्यात येत आहे. या संपूर्ण घटनेचा व्हिडिओ सोशल मीडियावर व्हायरल होत आहे.

स्थानिक लोकांचे म्हणणे आहे की, दरवर्षी पावसाळ्यात चक्की नदीच्या पुरामुळे नुकसान होते, परंतु यावेळी परिस्थिती अधिक धोकादायक बनली आहे. विमानतळ रस्ता वाहून जाणे आणि रेल्वे पुलाखाली माती सरकणे हा प्रशासनासाठी एक गंभीर इशारा आहे. गावकऱ्यांचे म्हणणे आहे की, "जर पुलाचे वेळीच संरक्षण करण्यासाठी पावले उचलली गेली नाहीत तर येत्या काळात वाहतुकीवर पूर्णपणे परिणाम होऊ शकतो."

हिमाचल प्रदेशमध्ये हवामान खात्याने पुढील २४ तासांसाठी अलर्ट जारी केला आहे . जर पाऊस असाच सुरू राहिला तर परिस्थिती आणखी बिकट होऊ शकते. प्रशासनाने लोकांना नद्या आणि ओढ्यांच्या काठावर जाणे टाळण्याचे आवाहन केले आहे. आपत्कालीन परिस्थितीत मदतकार्य त्वरित सुरू करता यावे यासाठी बचाव पथकालाही सतर्क करण्यात आले आहे.