Beggar iPhone 16 Pro Max Video : आयफोनची क्रेझ दिवसेंदिवस वाढत आहे. आजकाल प्रत्येकजण आयफोन खरेदी करत असल्याचे पाहायला मिळते. श्रीमंतांपासून सर्वसामान्यांपर्यंत अ‍ॅपल प्रोडक्टस् वापरत आहेत. अशातच सोशल मीडियावर एक व्हिडीओ व्हायरल होत आहे. या व्हिडीओमध्ये एका भिकाऱ्याकडे आयफोन 16 प्रो मॅक्स असल्याचे दिसते.

काही महिन्यांपूर्वी आयफोन 16 आणि त्याचे अपडेटेस व्हर्जन लॉन्च झाले होते. लाखभर किंमत असलेले आयफोन विकत घेण्यासाठी लोकांनी रांगा लावल्या होत्या. खास करुन तरुणांमध्ये नव्या आयफोनची क्रेझ पाहायला मिळत होती. काहींनी तर EMI वर आयफोन 16 विकत घेतले होते. दरम्यान रोख कॅश देऊन आयफोन 16 प्रो मॅक्स खरेदी करणाऱ्या भिकाऱ्याची माहिती समोर आली आहे.

हा भिकारी राजस्थानच्या अजमेर शहरामध्ये राहतो. त्याचा एक व्हिडीओ व्हायरल होत आहे. या व्हिडीओमध्ये भिकाऱ्याच्या हातामध्ये नवाकोरा आयफोन दिसतो. समोरुन प्रश्न विचारल्यानंतर तो स्वत:चे नाव सांगतो. हातातला फोन आयफोन 16 प्रो मॅक्स असून त्याची किंमत १ लाख ७० हजार रुपये इतकी असल्याचे तो भिकारी सांगतो. हा आयफोन कॅश देऊन खरेदी केल्याचेही तो सांगतो. व्हिडीओच्या भिक मागून मिळवलेल्या पैश्यांंतून आयफोन घेतला असे त्याने म्हटले.

या व्हिडीओची खास गोष्ट म्हणजे तो भिकारी विचारलेल्या प्रश्नांची इंग्रजीमध्ये उत्तरे देतो. अजमेर, राजस्थानमधला हा व्हिडीओ सध्या प्रचंड व्हायरल होत आहे. व्हिडीओवर अनेकांनी प्रतिक्रिया दिल्या आहेत. काहींनी भिकाऱ्याने आयफोन चोरला असल्याचे म्हटले आहे. तर काही यूजर्सनी हा व्हिडीओ स्क्रिप्टेड असून मुद्दाम तयार करण्यात आला आहे असे म्हटले आहे.