बुलढाणा : बुलढाण्यातील आमदार संजय गायकवाड पुन्हा एकदा चर्चेत आले आहेत. याच आमदार संजय गायकवाड यांचा आणखी एक कारनामा समोर आला आहे. बुलढाण्यात आमदार संजय गायकवाड यांनी मुलाचा वाढदिवस धुमधडाक्यात साजरा केला. मुलाच्या वाढदिवसाला आमदार संजय गायकवाड यांनी चक्क तलवारीने केक कापून मुलासहीत कार्यकर्त्यांना भरवला. तलवारीने केक भरवतानाचा व्हिडिओ सोशल मीडियावर व्हायरल झाला आहे. या व्हायरल व्हिडिओनंतर बुलढाण्यात उलटसुलट चर्चा सुरु झाल्या आहेत.

बुलढाण्यातील आमदार संजय गायकवाड हे नेहमी कोणत्या ना कोणत्या कारणाने चर्चेत राहतात. बुलढाण्यात शुक्रवारी शिंदे गटाचे आमदार संजय गायकवाड यांचे पुत्र, युवासेना कार्यकारणी सदस्य मृत्युंजय गायकवाड यांच्या शुक्रवारी वाढदिवस होता. या वाढदिवसाच्या कार्यक्रमासाठी शेकडो कार्यकर्त्यांनी हजेरी लावली. या वाढदिवसाचा कार्यक्रम शहराच्या मुख्य रस्त्यावरच आयोजित केला होता. या कार्यक्रमामुळे वाहतुकीचा रस्ता ठप्प झाला होता.

मुलाच्या वाढिवसाच्या कार्यक्रमात आमदार संजय गायकवाड यांनी मनोगत व्यक्त करताना त्यांनी केलेल्या विकासकामांचा पाढा वाचून दाखवला. तसेच त्यांनी प्रस्तावित कामांची यादी वाचून दाखवली. या कार्यक्रमात मुलाच्या वाढदिवसानिमित्त स्टेजवर भला मोठा केक आणण्यात आणला होता. यावेळी मंचावर गायकवाड यांच्या कुटुंबातील सर्व सदस्य उपस्थित होते. यावेळी आमदार संजय गायकवाड यांनी भरकार्यक्रमात तलवारीनेच केक कापला. त्यांनी केक कापल्यानंतर तलवारीच्या सहाय्याने कुटुंबातील सदस्यांना केक भरवला. चक्क तलवारीने केक कापल्यानंतर या वाढदिवसाची सर्वत्र चर्चा होत आहे.

दरम्यान, संजय गायकवाड यांच्या मुलाच्या वाढदिवसाचा व्हिडिओ सोशल मीडियावर व्हायरल होत आहे. या कार्यक्रमात आमदार संजय गायकवाड यांनी तलवारीने केक भरवल्याची सर्वत्र चर्चा होत आहे.