सध्या गरमीच्या दिवसात शरीर थंड राहावं म्हणून आपण गारेगार कलिंगड खातो. मात्र, हा व्हिडिओ नीट पाहा... या व्हिडीओत कलिंगड हिरवं गार असल्याचं दिसतंय. मात्र, हिरवंगार दिसण्यासाठी कलिंगडाला प्लास्टिकचं कोटिंग करण्यात आल्याचा दावा व्हायरल व्हिडिओतून करण्यात येतोय. व्हिडीओच्या माध्यमातून नेमका काय दावा केला जातोय पाहूयात...
कलिंगडाला प्लास्टिक कोटींगचा दावा
कलिंगड हिरवंगार दाखवण्यासाठी प्लास्टिकचं कोटिंग करण्यात आलंय
वरची साल काढून दाखवत प्लास्टिकचं कोटिंग करण्यात आल्याचा दावा करण्यात आलाय.
मात्र, व्हिडीओ समोर आल्यानंतर या व्हिडिओची सत्यता एका शेतकऱ्याने समोर आणलीये. कलिंगडाला फ्रीजमध्ये ठेवल्यामुळे त्यावरचा पापुद्रा सैल होऊन तो काढता येत असल्याचं कलिंगड उत्पादक शेतकऱ्यानं सांगितलंय. इतकंच नाही तर प्लास्टिकच्या कलिंगडाच्या अफवेवर विश्वास न ठेवण्याचं आवाहन शेतकऱ्यानं केलंय... विशेष म्हणजे त्याचा रियालिटी चेकही या शेतकऱ्यानं करून दाखवलाय.
अनेकदा फळांना लवकर पिकवण्यासाठी किंवा ती ताजी दिसण्यासाठी केमिकल वापराचे प्रकार अनेकदा समोर येतात. त्याचाच फायदा उचलून व्हायरल व्हिडिओच्या माध्यमातून चुकीच्या अफवा पसरवून नागरिकांमध्ये भीती निर्माण केली जाते. मात्र यामुळे उत्तम दर्जाचे उत्पादनही संशयाच्या भोवऱ्यात सापडते आणि शेतकरी नाहक अडचणीत येतो. त्यामुळे ग्राहकांनी खऱ्या खोट्यातला फरक समजून घेण्याची गरज आहे.