आजवर तुम्ही चोरीच्या अनेक घटना ऐकल्या असतील. काही चोर अगदी पूर्ण घर साफ करतात. तर काही चोर दागिने लंपास करण्यासाठी मोठी शक्कल लढवतात. अशात सध्या सोशल मीडियावर चोरीच्या घटनेचा एक अतरंगी व्हिडिओ समोर आला आहे. हा व्हिडिओ पाहून तुमचं डोकं देखील चक्रावेल.

एखादी व्यक्ती चोरी करते तेव्हा तेव्हा त्यांना पैशांची गरज असते. पैसे दागिने चोरल्याचे तुम्ही अनेकदा ऐकले असेल. तसेच महागड्या वस्तू फोन चोरीच्या घटना देखील पाहिल्या असतील. मात्र तुम्ही कधी एखादी हिरवीगार अशी कुंडी कोणी चोरल्याचं ऐकलं आहे का? नोएडामध्ये ही घटना घडली आहे. एक श्रीमंत महिला आपल्या BMW कारमधून आली आणि तिने थेट एक कुंडी चोरून आपल्या कारमध्ये ठेवली आहे.

कुंडी कारमध्ये ठेवताना महिला दुकानाबाहेर असलेल्या सीसीटीव्ही कॅमेऱ्यात कैद झाली आहे. तसेच या घटनेचा व्हिडिओ देखील आता सोशल मीडियावर व्हायरल होताना दिसत आहे. महिलेने असं नेमकं का केलं असावं असा प्रश्न अनेकांच्या मनात उपस्थित होत आहे.

मिळालेल्या माहितीनुसार, नोएडामधील सर्वात पॉश आणि श्रीमंत व्यक्तींचा परिसर म्हणून ओळखल्या जाणाऱ्या सेक्टर १८ मधील आहे. व्हिडिओमध्ये तुम्ही पाहू शकता की, महिला रात्रीच्यावेळी या रस्त्यावर येते. ती आपल्या BMW कारमधून येथे येते. येथे आल्यावर ती आधी आजुबाजूला कोणी आहे का? कोण आपल्याला पाहत आहे का? याची शहानीशा करते.

त्यानंतर कुंडी चोरते. सुरुवातील कुंडी जास्त जड असल्याने तिला उचलता येत नाही. पण ती पूर्ण ताकतीने ही कुंडी उचलते आणि आपल्या कारमध्ये ठेवते. कुंडी कारमध्ये ठेवताना महिलेसोबत असलेला अन्य एक व्यक्ती कारचा दरवाजा उघडतो. कुंडी कारमध्ये ठेवून दोघेही तेथून निघून जातात.

महिलेने केलेल्या या कृत्यामुळे अनेकांनी तिच्यावर टिका केली आहे. मात्र या सर्वांना महिलेने आणखी आक्रमक होत उत्तर दिलं आहे. मी रोज अशीच कुंड्या चोरी करणार असं तिने म्हटलं आहे. या महिलेने आतापर्यंत २ कुंड्या चोरल्यात. पोलिसांत या बाबात तक्रार देण्यात आली असून पोलीस महिलेचा शोध घेत आहेत.