मुंबईतील हार्बर रेल्वेवरील लोकल ट्रेनच्या दारात लटकून शिवडी रेल्वे स्थानकात स्टंट करणाऱ्या तरुणाचा मध्य रेल्वेच्या माध्यमातून शोध सुरु आहे. लोकल ट्रेनच्या दारात लटकून स्टंट करणाऱ्या तरुणाचा व्हिडिओ व्हायरल होतोय. आरपीएफला कारवाई करण्याचे निर्देश देण्यात आले आहेत. आता पोलिसांकडून या टवाळखोराचा शोध सुरु करण्यात आला आहे.

व्हायरल होत असलेल्या व्हिडिओत दिसत आहे की, एक टवाळखोर लोकल ट्रेनच्या दरवाज्याच्या हँडलला एका हातानं लोंबकळत स्टंट करतो. या टवाळखोर तरुणाचा हात सुटला असता तर होत्याचं नव्हतं झालं असतं.. मात्र त्याची फिकीर न करता हा टवाळखोर रिल्समध्ये झळकण्यासाठी जीवावर उदार होऊन स्टंट करतोय. दरम्यान, याबाबत मध्य रेल्वेनं प्रवाशांना महत्त्वाचं आवाहन केलंय.

मध्य रेल्वेचं आवाहन

मध्य रेल्वेनं प्रवाशांना आवाहन केलं आहे की, ''जीवावर बेतेल असा प्रवास करु नका. लोकलने प्रवास करताना आपली काळजी घ्या. इतरांनाही स्टंटबाजी करण्यापासून रोखा. प्रवाशांनी 9004410735 या क्रमांकावर गैरकृत्यांची तक्रार करा.

लोकल ट्रेनमधील टवाळखोरांची स्टंटबाजी नवी नाही. त्यातल्या त्यात हार्बर रेल्वे मार्गावर तर अशा टवाळखोरांची सुळसुळाट आहे. मात्र अशा हुल्लडबाजांमुळे इतरांना जास्त त्रास होतो. त्यामुळे अशा स्टंटबाजांवर आळा घालायला हवा अशी मागणी प्रवाशांमधून होतेय.