मालाड परिसरातून एक संतापजनक घटना समोर आली आहे. एका वडापाव विक्रेत्याने थेट आपल्या पायांनी समोस्याचं पीठ मळलंय. सदर घटनेचा व्हिडिओ आता व्हायरल होत आहे. स्थानिकांनी यावर संताप व्यक्त केलाय.

मनसेचे मालाड उपसचिव शेख जब्बार यांनी हा संतापजनक प्रकार उघडकीस आणलाय. त्यांनी आपल्या एक्स अकाउंट व्हिडिओ शेअर केला आहे. व्हिडिओ शेअर करत त्यांनी कॅप्शनमध्ये सदर घटना मालवणी म्हाडा गेट नंबर 8 येथील असल्याचं सांगितलंय. हा व्हिडिओ वडापाव विकणाऱ्या एका विक्रेत्याच्या घरातला आहे. लोकांच्या जीवाशी खेळत असलेल्या या विक्रेतेवर कारवाई झाली पाहिजे, असं देखील शेख जब्बार यांनी कमेंटमध्ये लिहिलं आहे.

सदर घटनेचा व्हिडिओ व्हायरल झाल्यानंतर मालाड परिसरातून नागरिकांनी संताप व्यक्त केला आहे. बाहेरचे समोसे, वडापाव असे पदार्थ नागरिक फार आवडीने खातात. मात्र हे पर्दाथ व्यवस्थित स्वच्छता न बाळगता बनवल्याने नागरिकांच्या आरोग्यावर याचा परिणाम होतो. समोसा बनवतानाचा हा व्हिडिओ पाहून तुम्ही देखील येथून पुढे समोसा खाताना १० वेळा विचार कराल.

स्वच्छता न बाळगता पदार्थ बनवल्याने नागरिकांना फूड पॉइजन, विषबाधा देखील होते. काही दिवसांपूर्वी साम टीव्हीने देखील असाच एक प्रकार समोर आणला होता. सकाळ भवन सीबीडी बेलापूर येथे समोर असलेल्या बिकानेर या शॉपमधून आणलेल्या समोसामध्ये चक्क झुरळ सापडलं होतं. त्यानंतर दुकानावर कारवाई करत हे दुकान बंद करण्यात आलं.

तसेच उल्हासनगरमधून देखील असाच एक व्हिडिओ समोर आला होता. या व्हिडिओमध्ये एक तरुण अस्वच्छपणे पायांनी समोस्याचं पीठ मळत होता. घटना उघडकीस आल्यावर या तरुणावर देखील कारवाई व्हावी अशी मागणी नागरिकांनी केली होती.