नाशिक जिल्ह्यातील तरुणाने मुंबईत मंत्रालयासमोर झाडावर आज चढून आंदोलन सुरू केलं आहे. गिरनानगर ग्रामपंचायतीच्या सरपंच अनिता पवार यांनी ग्रामपंचायतीत केलेल्या भ्रष्टाचाराची चौकशी करण्याच्या मागणीसाठी त्याने हे आंदोलन केल्याचं सांगितलं जात आहे.

गिरनानगर गावचा सुनील तुकाराम सोनवणे हा तरुण आज आपल्या मागण्यांसाठी मंत्रालयाजवळ असलेल्या झाडावर चढला होता. मागण्या पूर्ण होत नसल्याने त्याने झाडावर चढून आंदोलन सुरू केलं. गिरनानगर येथील ग्रामपंचायतीच्या सरपंच अनिता पवार यांनी ग्रामपंचायतीत केलेल्या भ्रष्टाचाराची चौकशी करण्यार यावी अशी मागणी सोनवणे याने केली आहे. त्यासाठी त्याने जिल्हा परिषद, पंचायत समितीकडे तक्रारही केली. मात्र तक्रार करूनही कारवाई होत नसल्याने त्याने थेट मंत्रालय गाठत मंत्रालयाच्या मुख्य दरवाजाच्या जवळ असलेल्या झाडावर चढून अर्धा तास आंदोलन केलेलं बघायला मिळालं. त्यानंतर पोलीस प्रशासनाने या ठिकाणी पोहोचून या तरुणाला खाली उतरवले.