दिल्ली येथील भारत मंडपम येथे आयोजित ‘AI समिट 2026’ दरम्यान शुक्रवारी युवक काँग्रेसच्या कार्यकर्त्यांनी शर्ट काढून आंदोलन करत घोषणाबाजी केली. “PM is Compromised” अशा घोषणा देत मोठा गोंधळ घालण्यात आला. या प्रकरणी युवक काँग्रेसच्या प्रदेश उपाध्यक्ष, सचिव आणि इतर पदाधिकाऱ्यांना पोलिसांनी अटक केली आहे.

या घटनेनंतर राजकीय वातावरण तापले असून काँग्रेस आणि भाजप या दोन्ही पक्षांकडून एकमेकांविरोधात आंदोलन करण्यात येत आहे. दरम्यान, मुंबई येथे भाजपच्या वसंतस्मृति कार्यालयाबाहेर काँग्रेसकडून जोरदार आंदोलन करण्यात आले. मुंबई युवक महिला काँग्रेसच्या अध्यक्षा शबरीन झीनात यांच्या नेतृत्वाखाली हे आंदोलन पार पडले. आंदोलनादरम्यान पंतप्रधान नरेंद्र मोदी यांच्या विरोधात घोषणाबाजी करण्यात आली. परिस्थिती नियंत्रणात आणण्यासाठी पोलिसांचा मोठा बंदोबस्त तैनात करण्यात आला होता. दरम्यान, शबरीन झीनात यांना पोलिसांनी ताब्यात घेतल्याची माहिती समोर आली आहे.