बचत गटाच्या माध्यमातून आर्थिक स्वावलंबनाचे स्वप्न पाहणाऱ्या महिलांची फसवणूक झाल्याचा धक्कादायक प्रकार कोल्हापूर जिल्ह्यातील करवीर तालुक्यात उघडकीस आला आहे. तालुक्यातील वाकरे येथे महिला बचत गटाच्या नावे चक्क ५ लाख रुपयांचा डल्ला मारण्यात आल्याने परिसरात खळबळ माजली आहे. महिलांच्या बनावट सह्या करून हे कर्ज उचलण्यात आल्याचा आरोप पीडित महिलांनी केला आहे. मिळालेल्या माहितीनुसार, वाकरे येथील मोलमजुरी करणाऱ्या महिलांनी आपला उदरनिर्वाह आणि बचतीसाठी बचत गट स्थापन केला होता. मात्र, या गटातील महिलांना अंधारात ठेवून त्यांच्या बनावट सह्या आणि कागदपत्रांचा आधार घेत ५ लाख रुपयांचे कर्ज काढण्यात आले. विशेष म्हणजे या महिलांनी प्रत्यक्ष कोणतेही कर्ज घेतलेले नसतानाही बँकेकडून त्यांना अचानक वसुलीच्या नोटिसा प्राप्त झाल्या.