नागपूर पोलिसांचा एक धक्कादायक व्हिडिओ समोर आला आहे. चौकीतच काही पोलीस कर्मचारी जुगार खेळताना आणि धुम्रपान करताना दिसत आहेत. कळमना पोलीस ठाण्यातील हा व्हिडिओ असल्याची माहिती मिळतेय. नागपुरात गंभीर गुन्हे घडत असताना नागरिकांना पोलिसांकडून मोठी अपेक्षा असते. मात्र पोलिसच ठाण्यात जुगार खेळायला बसल्यानं कायदा आणि सुव्यवस्थेचं काय होणार? असा प्रश्न आता नागपूरकर विचारत आहेत.

व्हिडिओमध्ये नेमकं काय?

नागपूरच्या कळमना पोलीस ठाण्यातला हा व्हिडिओ असल्याचं सांगितलं जातं. पोलीस चौकीतच पोलीस अधिकारी जुगार खेळताना दिसत आहे. इतकंच नाही तर सिगारेटचे झुरके मारतानाही ते दिसतात. हा व्हिडिओ तक्रारदारानं काढल्याचं अँगलवरून दिसतंय. या प्रकारामुळं सर्वसामान्यांमधून संताप व्यक्त केला जात असून, आता या जुगारी पोलिसांवर काय कारवाई होते, हे बघावं लागेल.