विधानसभा निवडणुकीच्या प्रचारासाठी अवघे काही तास शिल्लक असताना रविवारी रात्री आयोजित केलेल्या पत्रकार परिषदेत भिवंडी पश्चिम विधानसभा मतदारसंघातील एम आय एम पक्षाचे उमेदवार वारिस पठाण यांनी गंभीर आरोप केला. सर्व विरोधक मला प्रचारापासून रोखण्याचा प्रयत्न करत असल्याचा आरोप करीत भावूक होत ते रडले. मी येथे सर्वसामान्य जनतेचे काम करण्यासाठी आलो आहे. परंतु जाणीवपूर्वक माझ्या प्रचार रॅलीला परवानगी नाकारली जाते. माझ्या प्रचारात वाहन घुसवली जातात. मी या भिवंडी शहराला बदलण्यासाठी आलो आहे. येथे चांगल्या आरोग्य सुविधा,शहर स्वच्छता, चांगले शिक्षण मिळावे यासाठी मी येथे आलो आहे. चांगले काम करण्याचा प्रयत्न करतो हाच माझा दोष आहे.

मला रोखण्याचा प्रयत्न भाजपासोबतच सर्व विरोधक करत आहेत. भाजपाला मीच हरवू शकतो हे माहीत असल्याने सर्व विरोधी उमेदवार एक झाले आहेत.पण येथील निवडणूक जनतेने हाती घेतली असल्याने मी जिंकणार आहे मला सर्वसामान्य जनतेचा पाठिंबा आहे असा विश्वास वारीस पठाण यांनी व्यक्त केला आहे.