कोल्हापूरच्या वडणगे गावातील महादेव मंदिरावर वक्फ बोर्डाने दावा केला आहे. तसेच, बीडमधील कंकालेश्वर मंदिराची 12 एकर जमीन वक्फ बोर्डाने जबरदस्तीने ताब्यात घेतली होती. अमित शाहांच्या या विधानामुळे एकच खळबळ उडाली आहे.

या प्रकरणाची पडताळणी करण्यासाठी साम टीव्हीच्या प्रतिनिधींनी प्रत्यक्ष स्थळाला भेट दिली. गृहमंत्री अमित शाह यांनी संसदेत बीडच्या कंकालेश्वर मंदिराच्या जमिनीचा उल्लेख केल्यानंतर हे प्रकरण पुन्हा चर्चेत आले आहे. बीड जिल्ह्यात वक्फ बोर्डाच्या अनेक मालमत्ता आहेत, परंतु त्या कायदेशीर मालकीच्या आहेत की अतिक्रमित, याबाबत स्पष्टता नाही.

कंकालेश्वर मंदिराच्या मागील भागातील सर्वे नंबर 91, 92 आणि 1 वक्फ बोर्डाच्या मालकीचे असल्याचा दावा केला जात आहे. मात्र, ही 12 एकर जमीन वक्फ बोर्डाच्या ताब्यात आहे का, आणि भविष्यात ती कंकालेश्वर मंदिराला परत मिळेल का, याबाबत निश्चितता नाही. आता हा विषय केवळ चर्चेत राहणार की यावर ठोस निर्णय घेतला जाणार, हे पाहणे महत्त्वाचे ठरणार आहे.