बीडमधील मस्साजोगचे सरपंच संतोष देशमुख हत्या प्रकरणाची सुनावणी बीड विशेष न्यायालयासमोर झाली. संतोष देशमुख यांच्या हत्या प्रकरणी आरोपांतून निर्दोष मुक्त करण्यात यावे, असा अर्ज वाल्मिक कराडने वकील विकास खाडे यांच्यामार्फत न्यायालयात केला. मात्र, या मागणीला सरकारी वकील उज्ज्वल निकम यांनी विरोध केला आहे.

वाल्मिक कराडसंदर्भात वकील विकास खाडे यांनी न्यायालयाकडे अर्ज दाखल केला आहे. यावर सीआयडीकडून २४ तारखेला उत्तर देण्यात येईल, अशी माहिती निकम यांनी दिली. संतोष देशमुख हत्या प्रकरणातील आरोपींनी मारहाणीचे व्हिडिओ चित्रित केले होते, त्याचा पेन ड्राइव्ह कुठल्याही परिस्थितीत बाहेर जाता कामा नये किंवा सोशल मीडियावर प्रसिद्ध होऊ नयेत याची खबरदारी घ्यावी, अशी विनंती न्यायालयाकडे केली, अशी माहितीही त्यांनी दिली. महत्वाचे म्हणजे वाल्मिक कराडच्या अर्जाला निकम यांनी विरोध केला. मला या खटल्यातून निर्दोष मुक्त करावे, अशी मागणी वाल्मिक कराडने न्यायालयात केली आहे. त्यावर येत्या २४ तारखेला सीआयडी आपले म्हणणे मांडणार आहे, अशी माहितीही त्यांनी दिली. वाल्मिक कराडची चल-अचल संपत्ती जप्त करण्याची मागणीही त्यांनी यावेळी केली.