बीड माजी सरपंच संतोष देशमुख अपहरण, हत्या आणि खंडणी प्रकरणातील आरोपी वाल्मिक कराड बाबत कॉंग्रेसचे आमदार विजय वडेट्टीवार यांनी एक मोठा दावा केला आहे. मोठ्या आकाला वाचवण्यासाठी लहान आकाचा एन्काऊंटर होऊ शकतो असं विजय वडेट्टीवार म्हणाले आहेत. पोलीस दलातील अधिकाऱ्याचा हवाला देत त्यांनी हा मोठा दावा केला आहे.

संतोष देशमुख हत्या प्रकरणात 21 दिवसांपासून फरार असलेल्या आरोपी वाल्मिक कराड याने मंगळवारी पोलिसांना सरेंडर केलं. त्यानंतर त्याची चौकशी आता सुरू झाली आहे. सीआयडीकडून त्याची कसून चौकशी होत असतानाच आता कॉंग्रेसच्या वडेट्टीवार यांनी या सगळ्या प्रकारावर मोठा दावा केला आहे. बीडच्या मोठ्या आकाला वाचवण्यासाठी लहान आकाचा एन्काऊंटर होऊ शकतो असं त्यांनी म्हटलं आहे. पोलीस स्टेशनमध्ये बेड घेऊन गेलेत, यापूर्वीच असे कधी झाले नाही. हे कोणाचे लाड आहे? वाल्मिक कराडचे लाड पुरवेल जात आहे. यावर चौकशी झाली पाहीजे. मोठ्या आकाला वाचवण्यासाठी या लहान आका कराडचा एन्काऊंटर होऊ शकतो. एका जवळच्या उच्चपदस्थ अधिकारीऱ्याने ही खात्रीलायक माहिती दिली आहे, असं विजय वडेट्टीवार यांनी म्हंटलं आहे.