लाडकी बहिण योजनेवरून विरोधी पक्ष नेते विजय वडेट्टीवार यांनी सरकारवर ताशेरे ओढले आहेत. लाडकी बहिण योजनेच्या कार्यक्रमाला आता महिलांना धमकावून बसमध्ये बसवलं जात असल्याचा आरोप वडेट्टीवार यांनी केला आहे. 'बसमध्ये बसा, नाहीतर तुम्हाला 1500 रुपये मिळणार नाही,'' अशी धमकी महिलांना दिली जात असल्याचं वडेट्टीवार यांनी म्हंटलं आहे.

राज्य सरकारच्या मुख्यमंत्री माझी लाडकी बहिण योजनेवरून वेगवेगळे वादंग सुरू असतानाच आता विरोधी पक्ष नेते विजय वडेट्टीवार यांनी या योजनेवरून सरकारवर जोरदार टीका केली आहे. ''तुम्हाला पैसे हवे असतील तर गाडीत बसा, असा फर्मान या सरकारने अधिकाऱ्यांच्या माध्यमातून महिलांपर्यंत पोहोचवला आहे. गाडीत बसले नाही तर 1500 रुपये मिळणार नाहीत. असं सांगितल्याने लाडकी बहिण योजनेच्या कार्यक्रमात चेंगराचेंगरी होते.'' असा आरोप विजय वडेट्टीवार यांनी केला आहे. त्यामुळे एकीकडे सत्ताधारी पक्षात लाडकी बहिण योजनेवरून श्रेयवादाची लढाई सुरू असतानाच विरोधी पक्षाकडून या योजनेवर ताशेरे ओढले जात आहेत.