मुंबई : उद्धव ठाकरे पुढील तीन दिवस दिल्ली दौऱ्यावर आहेत, अशी माहिती ठाकरे गटाचे नेते संजय राऊत यांनी पत्रकार परिषदेत दिली आहे. या दौऱ्यामध्ये उद्धव ठाकरे कॉंग्रेस अध्यक्ष मल्लिकार्जून खर्गे, सोनिया गांधी आणि राहुल गांधी यांची भेट घेणार असल्याची माहिती मिळत आहे. आप आणि तृणमूल कॉंग्रेसच्या नेत्यांची देखील भेट घेणार आहेत. लोकसभा निवडणूक झाल्यानंतर पहिल्यांदाच उद्धव ठाकरे दिल्ली दौऱ्यावर आहेत.

विधानसभा निवडणुकीसाठी ठाकरे गटाकडून मोर्चेबांधणी सुरू झाल्याचं दिसतंय. शिवसेना उबाठा गटाचे पक्षप्रमुख उद्धव ठाकरे सहा, सात आणि आठ ऑगस्ट रोजी दिल्ली दौऱ्यावर असल्याचं राऊत यांनी सांगितलं आहे. त्यांच्यासोबत युवासेना प्रमुख आदित्य ठाकरे आणि रश्मी ठाकरे देखील असल्याची माहिती राऊतांनी दिलीय. राज्यात विधानसभा निवडणुकीची तयारी सुरू झालीय. त्यामुळेच राजकीय नेत्यांच्या दौरे आणि भेटीगाठी वाढल्या असल्याचं दिसत आहे.