रणजीत माजगांवकर, कोल्हापूर, साम टीव्ही

कोल्हापुरात वाहन पार्किंग करण्यावरून जोरदार वाद झाला. सुरुवातीला दोन गटांमध्ये बाचाबाची झाली. त्यानंतर हा वाद आणखीनच चिघळला आणि वाहनांच्या तोडफोडीपर्यंत पोहोचला. राजारामपुरीच्या नवव्या गल्लीत एका मिसळ सेंटरवर काही ग्राहक आले होते. त्यांनी तिथल्या स्थानिकांच्या घरासमोरच गाडी पार्क केली. घरासमोरच गाडी पार्क केल्यानं ग्राहक आणि स्थानिकांमध्ये वाद झाला.

घरासमोर उभी केलेली गाडी काढल्यामुळं तरुणांच्या एका गटानं स्थानिक व्यक्तीला मारहाण केली. ही घटना सीसीटीव्ही कॅमेऱ्यात कैद झाली आहे. दोन्ही गटांत तुफान हाणामारी झाली. तरुणांनी चारचाकी वाहनाची तोडफोड केली. तसेच बिअरच्या बाटल्याही फोडल्याचे सीसीटीव्ही फुटेजमध्ये दिसून येत आहे.