पुणे जिल्ह्यातील आंबेगाव तालुक्यातील मंचर शहरात मशिदीखाली भुयार सापडल्याने मोठी खळबळ उडाली. रस्त्याचे काम सुरू असताना मशिदीचा काही भाग कोसळला आणि त्यात भुयारासारखी रचना दिसून आली. ही माहिती पसरल्यानंतर परिसरात तणाव निर्माण झाला. हिंदू संघटनांनी या भुयाराचा सखोल तपास करून सत्य समोर आणण्याची मागणी केली, तर मुस्लिम समाजाने झालेल्या नुकसानीवर आक्षेप नोंदवला आणि ही घटना दुर्दैवी असल्याचे म्हटले. त्यामुळे शहरात काही काळ तणावाचे वातावरण निर्माण झाले होते. मात्र पोलिसांनी तातडीने बंदोबस्त लावत पाहणी केली असता, भुयारात कबर व्यतिरिक्त काहीही आढळले नाही. त्यामुळे परिस्थिती नियंत्रणात आली. मशिदीच्या दुरुस्तीचे काम सुरू असून, पोलिस प्रशासनाने शांतता राखण्याचे आवाहन केले आहे.