वैदेही काणेकर, मुंबई | साम टीव्ही

महाराष्ट्रातील विधानसभा, महापालिका, पालिका आणि स्थानिक स्वराज्य संस्थांच्या निवडणुका झाल्या आहेत. २०२९ मध्ये पुन्हा विधानसभा निवडणुका होणार आहेत. सर्वच प्रमुख राजकीय पक्षांनी त्यादृष्टीने तयारी सुरू केली आहे. काही दिवसांपूर्वीच शिंदेंची शिवसेना, राज ठाकरेंची मनसे या प्रादेशिक पक्षांनी संघटनात्मक बदल करत, पदाधिकाऱ्यांच्या निवडी जाहीर केल्या आहेत. महत्वाच्या नेत्यांवर जबाबदारी देताना काम करणार, तोच यापुढे पदावर राहणार असा इशाराही त्या-त्या पक्षांच्या प्रमुख नेत्यांनी संबंधितांना दिला आहे. आता उद्धव ठाकरेंच्या नेतृत्वातील शिवसेनेतही हालचालींना वेग आला आहे.

ठाकरेंची शिवसेना अॅक्शन मोडवर आली आहे. शिवसेना भवनात महत्त्वाची बैठक झाली. मुंबई महापालिका निवडणुकीनंतर आमदार आदित्य ठाकरेंनी मुंबईतील सर्व शाखा प्रमुखांची बैठक घेतली आहे. आदित्य ठाकरे मुंबईतील प्रत्येक शाखांना भेटी देणार आहेत. पक्षबांधणीच्या अनुषंगाने ठाकरेसेना लवकरच स्थानिक पाठळीवर बदल करण्याच्या तयारीत आहे. पदावर असून कोणाच्या दबावामुळे जर काम करता येत नसेल तर, त्यांना पदापासून दूर करून नव्या कार्यकर्त्यांना संधी दिली जाईल, असं आदित्य ठाकरेंनी सांगितल्याचे कळते.