मालवण : खासदार नारायण राणे यांच्यावर धमकावल्या प्रकरणी गुन्हा दाखल करण्याची मागणी ठाकरे गटाचे आमदार वैभव नाईक यांनी केली आहे. आमदार वैभव नाईक यांनी पोलीस अधीक्षक सिंधुदुर्ग यांना लेखी पत्राद्वारे केली आहे. मंगळवारी मालवण येथील राजकोट किल्ल्यावर ठाकरे गट आणि राणे समर्थक यांच्यात राडा झाला होता. यावेळी तेथे उपस्थित असलेल्या नारायण राणे यांनी पोलीसांसमोरच मला आणि माझ्या सहकाऱ्यांना मारून टाकण्याची धमकी दिली. तसेच माझे काका श्रीधर नाईक यांची राजकीय वैमनस्यातून हत्या झाली होती. त्यामध्ये नारायण राणे हे १३ वे आरोपी होते. त्यामुळे त्यांची गुन्हेगारी पार्श्वभूमी लक्षात घेऊन त्यांच्यावर मारून टाकण्याची धमकी दिल्या प्रकरणी गुन्हा दाखल करण्याची मागणी वैभव नाईक यांनी केली आहे.