मुंबईतील ऐतिहासिक शिवाजी पार्कवर राज ठाकरे आणि उद्धव ठाकरे यांची संयुक्त सभा पार पडली. महापालिका निवडणुकांच्या पार्श्वभूमीवर झालेल्या या सभेत आधी राज ठाकरे यांनी, त्यानंतर उद्धव ठाकरे यांनी भाजपवर कडाडून टीका केली.

उद्धव ठाकरे यांनी थेट मुख्यमंत्री देवेंद्र फडणवीस यांना लक्ष्य करत जोरदार प्रहार केला. अजित पवारांवर यापूर्वी भाजपकडून करण्यात आलेल्या आरोपांचा संदर्भ देत उद्धव ठाकरे म्हणाले, “तुम्ही अजित पवारांवर आरोप करताना पुरावे असल्याचं सांगितलं होतं. आता ते पुरावे जाळायचे का, हे तुम्हीच सांगा. जर त्या पुराव्यांमध्ये दम असेल तर अजित पवारांना लाथ मारून हाकलून द्या. आणि जर दम नसेल, तर जाहीरपणे अजित पवारांची माफी मागा. असे आव्हान उद्धव ठाकरे यांनी केले.