त्रिभाषा धोरणाबाबतचा जीआर सरकारने रद्द केल्यानंतर, आज ठाकरेंची शिवसेना आणि महाराष्ट्र नवनिर्माण सेनेतर्फे विजयी मेळाव्याचे आयोजन करण्यात आले आहे. हा भव्य एकत्रित मेळावा मुंबईतील वरळी येथील डोममध्ये पार पडणार असून, राज्याच्या राजकीय वर्तुळात याकडे मोठ्या उत्सुकतेने पाहिले जात आहे.विशेष म्हणजे, या विजयी मेळाव्याच्या निमित्ताने उद्धव ठाकरे आणि राज ठाकरे तब्बल दोन दशकांनंतर एकाच व्यासपीठावर येणार आहेत. सकाळी 11.30 वाजता दोन्ही नेते डोममध्ये दाखल होणार आहेत.

कार्यक्रमात सहभागी होणाऱ्या कार्यकर्त्यांना कोणताही पक्षाचा झेंडा किंवा चिन्ह घेऊन न येण्याचे आवाहन करण्यात आले आहे. शांततेत आणि संयमानं हा मेळावा पार पाडण्याचे आवाहनही आयोजकांकडून करण्यात आले आहे.त्रिभाषा धोरणाच्या विरोधात एकत्र लढा देणाऱ्या दोन्ही पक्षांच्या कार्यकर्त्यांसाठी हा दिवस ऐतिहासिक ठरणार आहे. त्यामुळे या मेळाव्याकडे संपूर्ण राज्याचे लक्ष लागून राहिले आहे.