Uday Samant's Cryptic Status : शिवसेना (UBT) प्रमुख उद्धव ठाकरे आणि मुख्यमंत्री देवेंद्र फडणवीस यांनी मुंबईहून नागपूरला जाताना एकाच विमानाने एकत्र प्रवास केला. या प्रवासादरम्यान विमानामध्ये उद्धव ठाकरे यांच्यासोबत आदित्य ठाकरे, संजय राऊत, अनिल देसाई, विनायक राऊत हे नेतेही उपस्थित होते. या प्रवासानंतर शिंदेसेनेचे नेते उदय सामंत यांनी ठेवलेले स्टेट्‍सची सध्या राजकीय वर्तुळात चर्चा सुरू आहे.

योग्य लोकांचे हात हातात असतील तर चुकीच्या लोकांची साथ धरायची कधीच वेळ येत नाही. असा मजकूर आणि देवेंद्र फडणवीस आणि एकनाथ शिंदे यांचा हातात हात असलेला फोटो सामंत यांनी स्टेट्‍सला ठेवला आहे. त्याशिवाय धनुष्यबाण आणि कमळ चिन्ह असलेला फोटो स्टेट्‍सला ठेवण्यात आलाय. मुख्यमंत्री देवेंद्र फडणवीस आणि उद्धव ठाकरे यांच्या कालच्या एकत्रित विमान प्रवासावर सामंत यांच्या स्टेट्सला महत्व आलेय.

ठाकरे-फडणवीस या दोन्ही नेत्यांच्या एकत्र विमान प्रवासामुळे आणि त्यांच्यात झालेल्या संवादाच्या फोटोंमुळे महाराष्ट्राच्या राजकीय वर्तुळात जोरदार चर्चा सुरू झाली आहे. या भेटीवर सूचक भाष्य करताना उद्धव ठाकरे यांनी पत्रकारांना सांगितले की, "विमानामध्ये आमची उच्च दर्जाची आणि उच्चस्तरीय चर्चा झाली असून, काय ठरले ते येत्या काही दिवसांत कळेल." तसेच हा दौरा त्यांच्या बंडखोर खासदारांच्या मतदारसंघातील (विशेषतः यवतमाळ) दौऱ्याची सुरुवात आहे.