बालाजी सुरवसे, तुळजापूर

तुळजापूर ड्रग्ज तस्करी प्रकरणातील आरोपी असलेल्या पुजाऱ्यांवर कडक कारवाई करण्यात येणार आहे. तुळजाभवानी मंदिर संस्थाननं हा निर्णय घेतला आहे. ड्रग्ज तस्करी प्रकरणात गुन्हे दाखल असलेल्या आरोपी पुजाऱ्यांना कायमस्वरूपी तुळजाभवानी मंदिरात प्रवेशबंदीची कारवाई करण्यात येणार आहे.

विधान परिषदेच्या उपसभापती डॉ. नीलम गोऱ्हे यांनी कारवाई करण्याचे आदेश दिल्यानंतर तुळजाभवानी मंदिर संस्थान अॅक्शन मोडवर आले आहे. ड्रग्ज तस्करी प्रकरणाच्या चौकशीत ११ पुजाऱ्यांची नावे समोर आल्याची प्राथमिक माहिती आहे. मंदिर संस्थान या पुजाऱ्यांवर प्रवेशबंदीची कारवाई करणार आहे. तुळजापूर ड्रग्ज तस्करी प्रकरणात आतापर्यंत ३५ आरोपी असल्याचे स्पष्ट झाले असून, ८० जणांना चौकशीसाठी नोटिसा बजावण्यात आल्या आहेत. तुळजाभवानी मंदिर संस्थान ड्रग्स तस्करी प्रकरणात गुन्हा दाखल असलेल्या आरोपी पुजाऱ्यांची नावे लेखी पत्र देऊन मागवून घेणार आहे. जिल्हाधिकारी तथा तुळजाभवानी मंदिर संस्थानचे अध्यक्ष किर्ती किरण पुजार यांच्या आदेशानुसार कारवाई केली जाणार असल्याची माहिती आहे.