पाकिस्तानातून मोठी बातमी समोर आली आहे. दक्षिण वझिरिस्तानमधील सरगोधा येथे तहरीक-ए-तालिबान पाकिस्तान (TTP) या दहशतवादी संघटनेने केलेल्या हल्ल्यात पाक लष्कराचा मेजर मोईझ अब्बास शाह ठार झाला आहे.विशेष म्हणजे, हा तोच अधिकारी आहे ज्याने २०१९ मध्ये भारताच्या बालाकोट एअर स्ट्राइकनंतर विंग कमांडर अभिनंदन वर्धमान यांना ताब्यात घेतलं होतं. या हल्ल्यात लान्स नाईक जिब्रान याचा देखील मृत्यू झाला आहे.

या हल्ल्यानंतर पाकिस्तान लष्कराने प्रत्युत्तरात ११ टीटीपी दहशतवाद्यांना ठार केल्याचा दावा केला आहे. सध्या या भागात तणावपूर्ण परिस्थिती असून सुरक्षा दलांकडून शोधमोहीम सुरू करण्यात आली आहे.हा हल्ला पाकिस्तानातील दहशतवादी संघटनांची वाढती ताकद आणि लष्करावर होणारे थेट हल्ले यांचं प्रतीक मानलं जात आहे. सुरक्षा यंत्रणांनी सतर्कतेचे आदेश दिले असून दक्षिण वझिरिस्तानमध्ये लष्करी हालचालींना वेग आला आहे.