मुंबई : राज्यभरात पु्न्हा पावसाने दमदार हजेरी लावली आहे. तर जळगावमध्ये मागील आठ दिवसांपासून मुसळधार पाऊस सुरू आहे. या पावसामुळे जिल्ह्यामध्ये अनेक ठिकाणी पूरग्रस्त परिस्थिती निर्माण झालीय. यामुळे नागरिकांची मोठी दाणादाण उडाली आहे. यादरम्यानच पुराच्या पाण्यात ट्रॅक्टर वाहून गेल्याची धक्कादायक घटना समोर आली आहे. जळगावकरांना गेल्या आठ दिवसांपासून पावसाचा फटका सहन करावा लागत आहे. यामुळे नागरिकांचे मोठ्या प्रमाणावर आर्थिक नुकसान झाल्याचं देखील समोर आलंय.

दापोरी गावाजवळील नाग झिरी येथील गिरणा नदी पात्रातील ही घटना असल्याचं सांगितलं जातंय. या मध्ये ट्रॅक्टरसह चालक देखील वाहून गेल्याची भीती व्यक्त केली जात आहे. गेल्या आठ दिवसांपासून जळगावमध्ये पावसाचा जोर पाहायला मिळत आहे. ट्रॅक्टर वाहून गेल्याचा हा व्हिडिओ सोशल मीडियावर मोठ्या प्रमाणात व्हायरल होतोय. व्हिडिओमध्ये दिसतंय की, मुसळधार पावसामध्ये पाण्याच्या प्रवाहात ट्रॅक्टर वाहून जातोय.