सरपंच संतोष देशमुख हत्येचा मुख्य आरोपी वाल्मिक कराडच असल्याचे आरोपपत्रात नमूद केले आहे. त्यांनंतर आता बीडमधून एकेक गुंड, भाई, आका, खोका असे बिळातून बाहेर येत आहे. शिरूर तालुक्यात दिलीप ढाकणे आणि महेश ढाकणे या बाप लेकावर अमानुषपणे मारहाण केल्याचा व्हिडीओ समोर आल्यानंतर एकच खळबळ उडाली. मारहाण करणारा व्यक्ती हा सतीश भोसले उर्फ खोक्या असल्याचे पोलिसांनी सांगितले. त्यानंतर खोक्याचे अनेक कांड समोर येऊ लागले आहे. खोक्या हा भाजप आमदार सुरेश धस यांचा कार्यकर्ता असल्याचे धस यांनी देखील मान्य केले. आता आमदार सुरेश धस यांच्यावर आणखी एक गंभीर आरोप करण्यात आला आहे.

हा आरोप ओबीसी नेते टीपी मुंडे यांनी केला आहे. शिरूर तालुक्यातील सतीश उर्फ खोक्या भोसले याने शिकार केलेल्या हरणांचे मटण सुरेश धस यांच्या ताटात जात असल्याचा धक्कादायक आरोप मुंडे यांनी केला आहे. पुढे मुंडे म्हणाले, असा प्रकार जर होत असेल तर खोक्यावर कसा गुन्हा दाखल होईल, असा सवालही मुंडे यांनी केला. तसेच या प्रकरणावर आपण वनमंत्र्यांना आणि मुख्यमंत्री देवेंद्र फडणवीसांची देखील मंगळवारी भेट घेणार असल्याचे मुंडे यांनी सांगितले. तसेच हरीण तस्करीमध्ये सुरेश धस यांना देखील सहआरोपी करा ते पण आकांचे आका आहेत, असा आरोप त्यांनी केला.