बॉलिवूड अभिनेता टायगर श्रॉफ याच्यावर गोळीबार करून फरार झालेल्या तिन्ही आरोपींच्या मुसक्या आवळल्या. कोटा रेल्वे स्थानकातून या तिघांना ताब्यात घेण्यात आलं. फूल सिंह, रुतिक कुमार आणि रेहान अशी ताब्यात घेतलेल्या आरोपींची नावं आहेत. अँटी गँगस्टर टास्क फोर्स आणि राजस्थान पोलिसांनी संयुक्त कारवाई केली. हल्ल्यानंतर आरोपी मुंबईहून दिल्लीच्या दिशेनं जाणाऱ्या ट्रेनमधून प्रवास करत असताना पकडले गेले. आरोपींमध्ये एक महाराष्ट्रातील, तर दोघे हरियाणामधील आहेत. या तिघांना पकडून पहिल्यांदाच कॅमेऱ्यासमोर आणण्यात आलं.

मुंबईच्या जुहू परिसरात रविवारी संध्याकाळी उशिरा तिघांनी टायगरवर गोळीबार केला होता. टायगर कारमधून जात असताना, तिघांनी समोरून त्याच्यावर गोळीबार केला. या हल्ल्यातून तो बालंबाल बचावला. तो सुखरूप आहे. या घटनेनंतर हे तिघेही आरोपी फरार झाले होते. त्यांना कोटा रेल्वे स्थानकातून ताब्यात घेतलं आहे.

तत्पूर्वी, या हल्ल्यानंतर काही वेळातच लॉरेन्स बिश्नोई टोळीनं त्याची जबाबदारी घेतली. या टोळीशी संबंधित गुंड अनिल पंडित आणि हरमन संधु यांनी या हल्ल्याची जबाबदारी घेतली.