अभिनेता टायगर श्रॉफ याच्या कारवर झालेल्या गोळीबाराच्या घटनेने मुंबईतील सुरक्षा व्यवस्थेचा प्रश्न पुन्हा ऐरणीवर आला आहे. काल संध्याकाळी सातच्या सुमारास जुहू परिसरातील पुष्पा नरसी पार्कजवळ ही घटना घडली. या प्रकरणात पोलिसांनी गोळीबारासाठी वापरण्यात आलेली दुचाकी जप्त केली आहे. गोळीबारानंतर तिन्ही हल्लेखोर एकाच दुचाकीवरून फरार झाले. त्यांनी मीठीबाई कॉलेजमार्गे एस. व्ही. रोडने अंधेरी रेल्वे स्थानक गाठले. त्यानंतर तिघेही वेगवेगळे झाल्याची माहिती समोर आली आहे. दरम्यान, सुरत एक्स्प्रेसमधून तीन संशयितांना ताब्यात घेण्यात आल्याचे सांगण्यात येत आहे. या आरोपींचे सीसीटीव्ही फुटेज समोर आले असून, राजस्थानमधील कोटा येथे त्यांना ताब्यात घेतानाचे दृश्य कैद झाले आहे. सीसीटीव्हीच्या आधारे पोलिसांनी शोधमोहीम राबवत ही कारवाई केली. सध्या संशयितांची कसून चौकशी सुरू असून, या गोळीबारामागील नेमके कारण शोधण्याचे प्रयत्न पोलिसांकडून सुरू आहेत.