पुण्यात चंदन चोरीच्या घटना नवीन नाहीत मात्र शहरातील गजबजलेल्या प्रभात रस्त्यावरील एका बंगल्यात शिरून चोरट्यांनी शस्त्राच्या धाकाने चंदनाचे झाड चोरून नेल्याची घटना समोर आली आहे. डेक्कन पोलीस ठाण्यात गुन्हा दाखल करण्यात आला. ही घटना शनिवारी मध्यरात्रीच्या सुमारास घडलीय. तक्रारदार परळीकर कुटुंबीय प्रभात रस्ता परिसरातील भारती निवास कॉलनीत राहण्यास आहेत. शनिवारी मध्यरात्री चंदन चोरटे बंगल्यात शिरले. गाढ झोपेत असलेल्या महिला आणि तिच्या कुटुंबीयांना बंगल्यात अज्ञात व्यक्ती शिरल्याचे लक्षात आले. चोरट्यांचा आवाज त्यांनी ऐकला. महिला बंगल्याच्या आवारात आली. त्यावेळी सात ते आठ चोरटे आवारातील चंदनाचे झाड करवतीने कापत असल्याचे निदर्शनास आले. महिलेने आरडाओरडा केला असता चोरट्यांनी महिला आणि तिच्या कुटुंबीयांना शस्त्राचा धाक दाखवून जीवे मारण्याची धमकी दिली. चोरट्यांनी बंगल्याच्या आवारातील चंदनाचे झाड कापून नेले. ७० वर्ष जुने झाड कापल्याने दुःख तर होत आहे पण अशा चोऱ्या होत असतील तर कशाला झाडे ठेवायची असा प्रश्न या कुटुंबीयांनी व्यक्त केला आहे.