संघर्ष गांगुर्डे, साम टीव्ही

कल्याण-डोंबिवली महानगरपालिकेच्या महासभेत सोमवारी ठाकरे गट आणि शिवसेना शिंदे गटातील नगरसेवकांमध्ये जोरदार शाब्दिक चकमक उडाली. यामुळे महासभेत काही काळ गोंधळाचे वातावरण निर्माण झाले. पालिका महासभेत शहरातील खड्ड्यांच्या प्रश्नावरून हा वाद पेटला.

महासभेत बोलताना शिवसेना ठाकरे गटाचे गटनेते उमेश बोरगावकर यांनी शहरातील रस्त्यांची दुरवस्था आणि खड्ड्यांच्या समस्येवर प्रशासनासह सत्ताधाऱ्यांवर टीका केली. यावेळी त्यांनी खासदार डॉ. श्रीकांत शिंदे यांना एकदा कल्याणच्या रस्त्यांवर फिरवा, सर्व रस्ते खड्डेमुक्त होतील,असे विधान केले.

बोरगावकर यांच्या या वक्तव्यावर शिवसेना शिंदे गटाच्या नगरसेवकांनी तीव्र आक्षेप घेतला. स्थायी समिती सभापती मल्लेश शेट्टी, शिवसेना गटनेते विश्वनाथ राणे यांच्यासह इतर नगरसेवकांनी बोरगावकर यांना धारेवर धरत त्यांच्या वक्तव्याचा निषेध केला. यावेळी शिंदे गटाच्या नगरसेवकांनी उद्धव ठाकरे यांनाही कल्याणमध्ये फिरवा, आमच्या नेत्यांमध्ये दम आहे, अशा शब्दांत प्रत्युत्तर देत जोरदार घोषणाबाजी केली. दोन्ही गटांतील सदस्य एकमेकांसमोर आल्याने महासभेत काही काळ गोंधळाची परिस्थिती निर्माण झाली.