विनायक वंजारे, सिंधुदुर्ग | साम टीव्ही

महापालिका निवडणुकीत बिनविरोध निवडीवरून सत्ताधारी आणि विरोधकांमध्ये राजकीय रणकंदन माजलं होतं. विरोधी पक्षांच्या नेत्यांनी सत्ताधाऱ्यांवर अनेक आरोप केले होते. या आरोपांची धूळ खाली बसत नाही तोच आता जिल्हा परिषद आणि पंचायत समिती निवडणुकांमध्ये बिनविरोध निवडीचं सत्र सुरू झालं आहे. यावेळी कोकणातून बिनविरोध निवडीला सुरुवात झाली आहे. कणकवली तालुक्यात भाजपनंतर एकनाथ शिंदेंच्या शिवसेनेनं खातं उघडलं आहे.

कणकवली तालुक्यातील जाणवली जिल्हा परिषद गटातील शिंदेसेनेच्या उमेदवार रुहिता तांबे यांच्या विरोधातील हेलन कांबळे या शिवसेना ठाकरे गटाच्या उमेदवारानं माघार घेतली. त्यामुळं जाणवली गटाच्या उमेदवार तांबे या बिनविरोध निवडून आल्या. रुहिता तांबे या ओटव गावच्या सरपंच असून खारेपाटण सरपंच प्राची इस्वलकर यांच्या पाठोपाठ ओटव गावच्या सरपंच रुहिता तांबे या दोन्ही जिल्हा परिषदेच्या उमेदवार बिनविरोध निवडून आल्या आहेत. या निवडीमुळे जिल्हा परिषद निवडणुकीत महायुतीचे आतापर्यंत तीन उमेदवार बिनविरोध निवडून आले आहेत. त्याची अधिकृत घोषणा निवडणूक आयोगाकडून मतमोजणीच्या दिवशी होणार आहे.