मुंबई : ठाण्यातील टेंभी नाका येथील आनंद आश्रमात पैसे उधळण्याचा प्रकार समोर आला. यावरून मात्र राज्यात संतापाची लाट आहे. ठाकरे गटाचे खासदार संजय राऊत यांनी सत्ताधाऱ्यांवर हल्लाबोल केलाय. माध्यमांशी बोलताना संजय राऊत म्हणाले की, आनंद दिघे साहेब असते तर त्यांनी पैसे उधळणाऱ्या लोकांच्या बॉसला टेंभी नाक्यावर चापकाने फोडून काढलं असतं.

राऊत यांनी सांगितलं की, आनंद दिघे जिथे बसत होते त्या खुर्चीवरती एक हंटर लावलेला असायचा. त्या हंटरचा अर्थ असा होता की, चुकाल तर पाठीवर हंटर पडेल. अनेकांना तो हंटर पडलेला देखील आहे. कुठली संस्कृती ठाण्यामध्ये आली? आनंद आश्रमाचा बेकायदेशीर ताबा घेतल्याचा आरोप देखील संजय राऊत यांनी केलाय. धाक , दहशत दाखवून ताबा घेतला. मुळात ती शिवसेनेची प्रॉपर्टी आहे, असं संजय राऊत म्हणाले आहेत.