वरळी डोममध्ये पार पडलेल्या विजयी मेळाव्यात आज एक ऐतिहासिक आणि भावनिक क्षण घडला. तब्बल दोन दशकांनंतर केवळ उद्धव ठाकरे आणि राज ठाकरेच नव्हे, तर त्यांचं संपूर्ण ठाकरे कुटुंब एकत्र आलेलं पाहायला मिळालं. या भव्य मेळाव्यासाठी उद्धव ठाकरे यांच्यासोबत त्यांची पत्नी रश्मी ठाकरे, मुलगा आदित्य ठाकरे, तसेच राज ठाकरे यांच्यासोबत पत्नी शर्मिला ठाकरे, मुलगा अमित ठाकरे आणि कुटुंबीय उपस्थित होते. या एकत्रित उपस्थितीमुळे सभागृहातील वातावरण भारावून गेले होते.

राजकीय मतभेद विसरुन ठाकरे कुटुंब एका व्यासपीठावर उभं राहिल्यामुळे कार्यकर्त्यांमध्ये उत्साहाचं आणि आनंदाचं वातावरण पाहायला मिळालं. अनेकांनी हा क्षण 'ठाकरे घराण्याच्या एकतेचं आणि महाराष्ट्राच्या भावनांचं प्रतीक' असल्याचं म्हटलं आहे. संपूर्ण कुटुंब एकत्र पाहिल्याने उपस्थित कार्यकर्त्यांच्या डोळ्यांत आनंदाश्रू पाहायला मिळाले.