आज प्रत्येक शिवसैनिक आणि मनसैनिकाचे स्वप्न पूर्ण झाल्यानंतर संपूर्ण महाराष्ट्रात आनंदाची लाट उसळली आहे. मराठीच्या मुद्यावर ठाकरे बंधुनी एकत्र येत भाजपवर जोरदार टीकास्त्र सोडले. सरकारने हिंदीसक्तीचा जीआर काढल्यानंतर उद्धव आणि राज ठाकरे यांनी या विरोधात मोर्चा काढून आंदोलन करणार होते. मात्र काही दिवसातच सरकारने हा शासन निर्णय रद्द केला. हा निर्णय रद्द केल्यानंतर या मोर्चाचे रूपांतर विजय मेळाव्यामध्ये झाले. आज तब्बल 19 वर्षांनंतर दोन्ही भाऊ एकत्र आल्याने शिवसैनिक आणि मनसैनिकांमध्ये नवचैतन्याचे वातावरण बघायला मिळाले. यावरच शिवसैनिकांनी प्रतिक्रिया देत म्हणाले आजचा दिवस आमच्यासाठी दिवाळीसारखा आहे. तर दोन भावांच्या एकत्र येण्यामुळे भाजपची पायाखालची वाळू सरकली आहे.