सरकारच्या 'लाडकी बहीण' योजनेवर विरोधक जोरदार टीका करताना दिसत आहेत. अशामध्ये स्वाभिमानी शेतकरी संघटनेचे नेते राजू शेट्टी यांनी देखील टीका केली आहे. 'लाडकी बहीण'ची भीक नको तर दुधाला भाव द्या, अशी मागणी राजू शेट्टी यांनी केली आहे. राजू शेट्टी यांच्यासोबत शेतकरी महिलांनी देखील मागणी केली आहे. '१५०० रुपयांमध्ये महिना कसा काढणार', असा संतप्त सवाल या महिलांनी केला आहे. 'आमच्या बहिणींचे रक्षण करायला आम्ही समर्थ आहोत.', असा देखील टोला राजू शेट्टी यांनी सरकारला लगावला आहे. त्याचसोबत, 'जर प्रत्येक शेतकऱ्याला उत्पादन खर्चापेक्षा कमी किंमतीमध्ये शेतीमाल विकावा लागत असेल तर त्या भगिनीची व्यथा बरोबर आहे. अशापद्धतीने शेतीमालाचे भाव धडाधड खाली येत असतील आणि त्याला सरकारचे धोरण कारणीभूत असेल तर अशी १५०० रुपयांची भीक कशासाठी?', असा सवाल देखील राजू शेट्टी यांनी सरकारला केला आहे.